Дэлхий дахинд алдаршсан дуучин PSY өнгөрсөн сард Өмнөд Солонгосын Ганвон мужийн Ганнюн хотод тоглолтоо хийсний дараа нэгэн эмгэнэлтэй явдал тохиолдсон билээ.

Долдугаар сарын 31-ний өдөр тоглолтын тайзыг буулгах үеэр гэрээт байгууллагын ажилтан болох 20 гаруй насны Монгол улсын иргэн өндрөөс унаж амиа алдсан юм. Талийгаач нь PSY-гийн менежмэнтийг хариуцдаг P Nation компанийн туслан гүйцэтгэгч байгууллагад ажиллаж байжээ.

Тэгвэл цагдаа нар Пүрэв гарагт Сөүл хот дахь P Nation компанийн төв байранд нэгжлэг явуулсан тухай Өмнөд Солонгосын хөдөлмөрийн яамны Ганвон мужийн салбар өчигдөр мэдээлжээ.

Тухайн өдрийн өглөөний 9:30 цагийн үед PSY-ийн P Nation компани болон талийгаачийн ажилладаг байсан туслан гүйцэтгэгч компанийн байранд цагдаа нар прокурорын зөвшөөрөлтэй нэвтэрсэн юм байна.