Цахилгааны тулгуур багана дээр согтуугаар гарсан иргэнийг эсэн мэнд буулгажээ

Эрэн сурвалжлах

Сэлэнгэ аймгийн Сүхбаатар сумын цахилгааны тулгуур багана дээр нэг хүн согтуугаар гарсан, унаж болзошгүй байна гэсэн дуудлагыг зургаадугаар сарын 22-ны өдрийн 21:40 цагт онцгой байдлын алба хүлээн авчээ.

Энэ дагуу Онцгой байдлын газрын Эрэн хайх, аврах ангийн алба хаагчид нэг км замыг туулан очиход тухайн иргэн согтуугаар Сүхбаатар-Алтанбулаг чиглэлийн цахилгаан дамжуулах агаарын шугамын 35 кв-ын 25 метрийн өндөртэй тулгуур багана дээр гарсан байжээ. Иймд Сүхбаатар-Алтанбулаг чиглэлийн хүчдэлийг 22:10 цагаас 00:30 цаг хүртэл тэжээлээс нь салгуулж, нийт гурван цаг ярилцлага хийн иргэнийг эсэн мэнд буулгаж, аймгийн Цагдаагийн газрын жижүүрийн мөрдөгчид хүлээлгэн өгсөн гэж Онцгой Байдлын Ерөнхий Газраас мэдээлэв.