Зургадугаар сарын 14-ний өдөр Дотоодын цэргийн 05 дугаар ангийн хугацаат цэргийн алба хаагч Н-ийн гэдэс задарч, нас барсан хэрэг гарсан. Уг асуудалтай холбогдуулан сүүлийн үеийн мэдээлэл авагдсан эсэх талаар Хууль зүй, дотоод хэргийн сайд Х.Нямбаатараас тодрууллаа.

Тэрээр, “Сургалтын төв дээр очсон алба хаагч тангараг өргөсний дараа нас барсан асуудал гарсан. Хэрэг гарсны дараа хууль хяналтын байгууллагаас шалгалт явуулж, шүүх эмнэлгийн шинжээч эмч нар үзлэг задлан шинжилгээ хийсэн. Урьдчилсан байдлаар ходоод нь цоорсон гэдэг дүгнэлт гаргасан. Сэтгүүлчид шүүх эмнэлгийн шинжилгээ хийсэн шинжээчдийн багаас асуу. Одоогийн байдлаар эцсийн дүгнэлт гараагүй. Одоогоор шалгалтын явцад дүрмийн бус дэг хийсэн зүйл тогтоогдоогүй. Хэвлэлийнхэн мэргэжлийн байгууллагын өмнөөс таамаг дэвшүүлж болохгүй. Хүний эрүүл мэндтэй холбоотой янз бүрийн асуудал байж болно. Заавал нэг хүн дэглэж, ходоодыг нь цоо өшиглөнө гэж ярих гээд байх юм. Тэгж их гадна талдаа хөхөрсөн шарх сорвигүй байсан гэсэн мэдээлэл авсан” гэлээ.  

Өнөөдөр 16.00 цагт цэргийн албан хаагчийн нас барсан шалтгаан нөхцөл болон шинжээчийн дүгнэлтийг холбогдох мэргэжлийн байгууллагууд танилцуулж мэдээлэл хийх юм байна.